mera yaqin kahin tha mera guman kahin

mirā yaqīn kahīñ thā mirā gumān kahīñ

maiñ kho gayā inhī donoñ ke darmiyān kahīñ

suḳhan-tarāz huā huuñ maiñ apne dil ke ḳhilāf

chipak na jaa.e mire nutq se zabān kahīñ

isī liye to kabhī mujtama’ na ho paayā

mirā zamān kahīñ thā mirā makān kahīñ

mizāj-e-dahr nahīñ e'tidāl par sāhib

chalī na jaa.e mire shahr se amaan kahīñ

bayān karne lagā huuñ shikastagī dil kī

chalā na jaa.e tirī samt merā dhyān kahīñ

kamand Daal rahā hai diloñ pe ḳhauf 'munīr'

simaT na jaa.e paroñ meñ mirī uḌaan kahīñ

mera yaqin kahin tha mera guman kahin

main kho gaya inhi donon ke darmiyan kahin

suKHan-taraaz hua hun main apne dil ke KHilaf

chipak na jae mere nutq se zaban kahin

isi liye to kabhi mujtama’ na ho paya

mera zaman kahin tha mera makan kahin

mizaj-e-dahr nahin e'tidal par sahib

chali na jae mere shahr se aman kahin

bayan karne laga hun shikastagi dil ki

chala na jae teri samt mera dhyan kahin

kamand Dal raha hai dilon pe KHauf 'munir'

simaT na jae paron mein meri uDan kahin