mera ye naghma bhi aah-o-buka na ho jae

mirā ye naġhma bhī āh-o-bukā na ho jaa.e

chahaktī bazm ye bazm-e-'azā na ho jaa.e

maiñ ḳhvāb dekhtā rahtā huuñ baat sach hai magar

haqīqatan hī tirā sāmnā na ho jaa.e

maiñ jis junūñ se tujhe chāhtā huuñ Dar hai mujhe

mirā junūn ye vahshat-sarā na ho jaa.e

tirī jo shoḳh adā dil mirā lubhātī hai

ye shoḳh adā kahīñ kāfir adā na ho jaa.e

bichhaḌ ke tujh se yahī bārhā maiñ sochtā huuñ

firāq bā'is-e-tark-e-vafā na ho jaa.e

abhī maiñ gā.ūñgā nauhe firāq meñ tere

ki jab talak jahāñ ḳhalvat-sarā na ho jaa.e

maiñ us ke kūche meñ jaanā to chāhtā huuñ bahut

bas ek Dar kahīñ mahshar bapā na ho jaa.e

bas is liye hī kiye band dil ke darvāze

muqīm is meñ koī dūsrā na ho jaa.e

vo ik ḳhatā jo mirī lazzat-e-gunāh rahī

'jalāl' phir se kahīñ vo ḳhatā na ho jaa.e

mera ye naghma bhi aah-o-buka na ho jae

chahakti bazm ye bazm-e-'aza na ho jae

main KHwab dekhta rahta hun baat sach hai magar

haqiqatan hi tera samna na ho jae

main jis junun se tujhe chahta hun Dar hai mujhe

mera junun ye wahshat-sara na ho jae

teri jo shoKH ada dil mera lubhati hai

ye shoKH ada kahin kafir ada na ho jae

bichhaD ke tujh se yahi barha main sochta hun

firaq ba'is-e-tark-e-wafa na ho jae

abhi main gaunga nauhe firaq mein tere

ki jab talak jahan KHalwat-sara na ho jae

main us ke kuche mein jaana to chahta hun bahut

bas ek Dar kahin mahshar bapa na ho jae

bas is liye hi kiye band dil ke darwaze

muqim is mein koi dusra na ho jae

wo ek KHata jo meri lazzat-e-gunah rahi

'jalal' phir se kahin wo KHata na ho jae