mere ghamon ka kisi ne KHayal bhi na kiya

mire ġhamoñ kā kisī ne ḳhayāl bhī na kiyā

kisī se maiñ ne magar arz-e-hāl bhī na kiyā

maiñ duur tak use dekhā kiyā na jaane kyoñ

Thahar ke jis ne zarā sā malāl bhī na kiyā

phirā maiñ baaġh meñ mānind-e-barg-e-āvāra

shamīm-e-gul ne magar pā.emāl bhī na kiyā

harīf ho ga.ī duniyā ye kyā kiyā maiñ ne

kisī hunar meñ kuchh aisā kamāl bhī na kiyā

shikast-e-jām pe maiñ phuuT phuuT kar royā

shikasta shīsha-e-dil kā ḳhayāl bhī na kiyā

mirī sarisht meñ vo lā-sharīk thā ki mujhe

ḳhudā-e-sāhab-e-ahl-o-ayāl bhī na kiyā

sitam-kashoñ ne hazāroñ savāl soche the

sitam-shi.ār ne lekin savāl bhī na kiyā

mere ghamon ka kisi ne KHayal bhi na kiya

kisi se main ne magar arz-e-haal bhi na kiya

main dur tak use dekha kiya na jaane kyon

Thahar ke jis ne zara sa malal bhi na kiya

phira main bagh mein manind-e-barg-e-awara

shamim-e-gul ne magar paemal bhi na kiya

harif ho gai duniya ye kya kiya main ne

kisi hunar mein kuchh aisa kamal bhi na kiya

shikast-e-jam pe main phuT phuT kar roya

shikasta shisha-e-dil ka KHayal bhi na kiya

meri sarisht mein wo la-sharik tha ki mujhe

KHuda-e-sahab-e-ahl-o-ayal bhi na kiya

sitam-kashon ne hazaron sawal soche the

sitam-shiar ne lekin sawal bhi na kiya