mere KHulus ka jab aapko KHayal nahin

mire ḳhulūs kā jab aap ko ḳhayāl nahīñ

mujhe bhī tark-e-ta.alluq kā kuchh malāl nahīñ

haiñ zaḳhm-e-shauq mirī zindagī kā sarmāya

huuñ mutma.in ki mujhe fikr-e-indimāl nahīñ

havādisāt-e-zamāna mirī zarūrat haiñ

qadam qadam pe mile haiñ ye ḳhāl-ḳhāl nahīñ

mile jo ḳhaak meñ sarsabz ho vahī daana

hai pā.emāl vahī jo ki pā.emāl nahīñ

tū ḳhaak hai tirī azmat hai ḳhāksārī meñ

zavāl us kā muqaddar jise zavāl nahīñ

har ek gaam ujālā har ik qadam saa.e

jahān-e-ġham meñ koī hādisa muhāl nahīñ

nasīb hotā koī ġham to jāgtī qismat

kisī ko us se to 'nāshād' qīl-o-qāl nahīñ

mere KHulus ka jab aap ko KHayal nahin

mujhe bhi tark-e-talluq ka kuchh malal nahin

hain zaKHm-e-shauq meri zindagi ka sarmaya

hun mutmain ki mujhe fikr-e-indimal nahin

hawadisat-e-zamana meri zarurat hain

qadam qadam pe mile hain ye KHal-KHal nahin

mile jo KHak mein sarsabz ho wahi dana

hai paemal wahi jo ki paemal nahin

tu KHak hai teri azmat hai KHaksari mein

zawal us ka muqaddar jise zawal nahin

har ek gam ujala har ek qadam sae

jahan-e-gham mein koi hadisa muhaal nahin

nasib hota koi gham to jagti qismat

kisi ko us se to 'nashad' qil-o-qal nahin