mere kirdar ke raushan hawale aap rakh lije

mire kirdār ke raushan havāle aap rakh liije

mujhe de kar ḳhushī mere ye naale aap rakh liije

mire ashkoñ se tar ye chand aurāq-e-tamanna haiñ

ye mujh se to nahīñ jaate sambhāle aap rakh liije

agar majnūñ hameñ rahnā hai to lailā bhī koī ho

masāfat ham rakheñ paañv ke chhāle aap rakh liije

hamāre naam se hī faal kā āġhāz kījegā

parinda jo bhī phir qur.a nikāle aap rakh lījiye

hameñ jal jaane hī diije ki ham jal kar hī raushan haiñ

añdhere ham sameTeñge ujāle aap rakh liije

ye duniyā kī chamak ye dard-e-dil ye be-ḳhudī merī

na jaane kab mujhe apnā banā le aap rakh lījiye

mujhe sach kahne diije merī fitrat kā taqāzā hai

zabāñ par mohr aur hoñToñ pe taale aap rakh liije

mere kirdar ke raushan hawale aap rakh lije

mujhe de kar KHushi mere ye nale aap rakh lije

mere ashkon se tar ye chand auraq-e-tamanna hain

ye mujh se to nahin jate sambhaale aap rakh lije

agar majnun hamein rahna hai to laila bhi koi ho

masafat hum rakhen panw ke chhaale aap rakh lije

hamare nam se hi fal ka aaghaz kijega

parinda jo bhi phir qura nikale aap rakh lijiye

hamein jal jaane hi dije ki hum jal kar hi raushan hain

andhere hum sameTenge ujale aap rakh lije

ye duniya ki chamak ye dard-e-dil ye be-KHudi meri

na jaane kab mujhe apna bana le aap rakh lijiye

mujhe sach kahne dije meri fitrat ka taqaza hai

zaban par mohr aur honTon pe tale aap rakh lije