mere labon pe gham-e-zindagi ki baat nahin

mire laboñ pe ġham-e-zindagī kī baat nahīñ

kuchh mujh ko fikr-e-ilāj-e-ġham-e-hayāt nahīñ

maiñ āshnā-e-ġham-e-kā.enāt huuñ lekin

mire malāl se āgāh kā.enāt nahīñ

ġham-e-hayāt ko siine se jo lagā na sake

mirī nazar meñ vo shā.ista-e-hayāt nahīñ

binā-e-husn-e-ruḳh-e-kā.enāt ham bhī haiñ

tumhīñ se dilkashī-e-bazm-e-kā.enāt nahīñ

haiñ zindagī kī bahāreñ unheñ nasīb to kyā

jinheñ shu.ūr-e-chaman-bandī-e-hayāt nahīñ

kise sunā.eñ ġham-e-zindagī ke afsāne

yahāñ koī bhī to āsūda-e-hayāt nahīñ

tirī jafā.eñ bhī mujh ko aziiz haiñ lekin

ye kyā ki mujh pe tirī chashm-e-iltifāt nahīñ

balā se ishrat-e-imroz ḳhvāb ho ki ḳhayāl

'atīq' rāhat-e-fardā to be-sabāt nahīñ

mere labon pe gham-e-zindagi ki baat nahin

kuchh mujh ko fikr-e-ilaj-e-gham-e-hayat nahin

main aashna-e-gham-e-kaenat hun lekin

mere malal se aagah kaenat nahin

gham-e-hayat ko sine se jo laga na sake

meri nazar mein wo shaista-e-hayat nahin

bina-e-husn-e-ruKH-e-kaenat hum bhi hain

tumhin se dilkashi-e-bazm-e-kaenat nahin

hain zindagi ki bahaaren unhen nasib to kya

jinhen shuur-e-chaman-bandi-e-hayat nahin

kise sunaen gham-e-zindagi ke afsane

yahan koi bhi to aasuda-e-hayat nahin

teri jafaen bhi mujh ko aziz hain lekin

ye kya ki mujh pe teri chashm-e-iltifat nahin

bala se ishrat-e-imroz KHwab ho ki KHayal

'atiq' rahat-e-farda to be-sabaat nahin