mere nasib ka likkha badal bhi sakta tha

mire nasīb kā likkhā badal bhī saktā thā

vo chāhtā to mire saath chal bhī saktā thā

ye tū ne Thiik kiyā apnā haath khīñch liyā

mire laboñ se tirā haath jal bhī saktā thā

uḌātī rahtī hai duniyā ġhalat-salat bāteñ

vo sang-dil thā to ik din pighal bhī saktā thā

utar gayā tirā ġham ruuh kī fazāoñ meñ

ragoñ meñ hotā to āñkhoñ se Dhal bhī saktā thā

maiñ Thiik vaqt pe ḳhāmosh ho gayā varna

mire rafīqoñ kā lahja badal bhī saktā thā

anā ko dhuup meñ rahnā pasand thā varna

tire ġhurūr kā sūraj to Dhal bhī saktā thā

ragaḌ sakī na mirī pyaas eḌiyāñ varna

har ek zarre se chashma ubal bhī saktā thā

pasand aa.ī na TuuTī huī fasīl kī raah

maiñ shahr-e-tan kī ghuTan se nikal bhī saktā thā

vo lamha jis ne mujhe reza-reza kar Daalā

kisī ke bas meñ jo hotā to Tal bhī saktā thā

mere nasib ka likkha badal bhi sakta tha

wo chahta to mere sath chal bhi sakta tha

ye tu ne Thik kiya apna hath khinch liya

mere labon se tera hath jal bhi sakta tha

uDati rahti hai duniya ghalat-salat baaten

wo sang-dil tha to ek din pighal bhi sakta tha

utar gaya tera gham ruh ki fazaon mein

ragon mein hota to aankhon se Dhal bhi sakta tha

main Thik waqt pe KHamosh ho gaya warna

mere rafiqon ka lahja badal bhi sakta tha

ana ko dhup mein rahna pasand tha warna

tere ghurur ka suraj to Dhal bhi sakta tha

ragaD saki na meri pyas eDiyan warna

har ek zarre se chashma ubal bhi sakta tha

pasand aai na TuTi hui fasil ki rah

main shahr-e-tan ki ghuTan se nikal bhi sakta tha

wo lamha jis ne mujhe reza-reza kar Dala

kisi ke bas mein jo hota to Tal bhi sakta tha