mere nasib ne jab mujhse intiqam liya

mire nasīb ne jab mujh se intiqām liyā

kahāñ kahāñ tirī yādoñ ne haath thaam liyā

fazā kī aañkh bhar aa.ī havā kā rañg uḌā

sukūt-e-shām ne chupke se terā naam liyā

vo maiñ nahīñ thā ki ik harf bhī na kah paayā

vo bebasī thī ki jis ne tirā salām liyā

har ik ḳhushī ne tire ġham kī aabrū rakh lī

har ik ḳhushī se tire ġham ne intiqām liyā

vo ma.arka thā ki fat.h o shikast bhī na milī

na jaane 'shāz' ne kis maslahat se kaam liyā

mere nasib ne jab mujh se intiqam liya

kahan kahan teri yaadon ne hath tham liya

faza ki aankh bhar aai hawa ka rang uDa

sukut-e-sham ne chupke se tera nam liya

wo main nahin tha ki ek harf bhi na kah paya

wo bebasi thi ki jis ne tera salam liya

har ek KHushi ne tere gham ki aabru rakh li

har ek KHushi se tere gham ne intiqam liya

wo marka tha ki fath o shikast bhi na mili

na jaane 'shaz' ne kis maslahat se kaam liya