mere raqib se hans kar kalam karte hue

mire raqīb se hañs kar kalām karte hue

guzar gayā hai vo mujh ko salām karte hue

ajab ki Dūbne vaalā to mutma.in hai magar

Darā huā hai samundar ye kaam karte hue

vo jis ke sāmne saste meñ rakh diyā ḳhud ko

ulajh paḌā hai vo gāhak bhī daam karte hue

mire vajūd pe qābiz huā vo pal bhar meñ

nazar kī teġh se dil ko ġhulām karte hue

bache-kuchhe se ye pal bhī guzar hī jā.eñge

kisī kī yaad meñ sāhil pe shaam karte hue

qasam ḳhudā kī ye girya na dekh pā.ūñgā

ḳhushī se jā.iye rishta tamām karte hue

'zakī' ye pyaar hī pahchān ban gayā merī

maiñ ḳhaas ho gayā ulfat ko aam karte hue

mere raqib se hans kar kalam karte hue

guzar gaya hai wo mujh ko salam karte hue

ajab ki Dubne wala to mutmain hai magar

Dara hua hai samundar ye kaam karte hue

wo jis ke samne saste mein rakh diya KHud ko

ulajh paDa hai wo gahak bhi dam karte hue

mere wajud pe qabiz hua wo pal bhar mein

nazar ki tegh se dil ko ghulam karte hue

bache-kuchhe se ye pal bhi guzar hi jaenge

kisi ki yaad mein sahil pe sham karte hue

qasam KHuda ki ye girya na dekh paunga

KHushi se jaiye rishta tamam karte hue

'zaki' ye pyar hi pahchan ban gaya meri

main KHas ho gaya ulfat ko aam karte hue