mere ruKHsar par aansu ka qatra ruk gaya hoga

mire ruḳhsār par aañsū kā qatra ruk gayā hogā

kisī kā ik hasīñ chehra bahut dhuñdlā gayā hogā

na jaane kis tarah se kar liyā apnā asiir us ne

hamāre saath chal kar duur tak vo aa gayā hogā

samundar kī hasīñ lahreñ kināre par rukeñ jaise

vo aise hī merī dahlīz par aa kar rukā hogā

mire ash.ār ke lafzoñ ko koī chhū na pā.egā

ki vo ik lafz mere lab pe aa kar ruk gayā hogā

taḌap jaate haiñ is miTTī kī ḳhushbū se kabhī ham to

hai is dhartī kā koī qarz jo yaad aa gayā hogā

ye ūñche ūñche parbat duur tak phaile hue saa.e

ye manzar apnī yādoñ meñ zamānoñ tak rahā hogā

kisī manzil pe to shāyad bahāreñ aa ga.ī hoñgī

koī to rāsta hogā jo phūloñ se sajā hogā

kisī maañ ke liye kitnī kaThin vo ik ghaḌī hogī

kisī bachche kā ḳhuun jis vaqt miTTī par bahā hogā

kisī kī yaad kī parchhā.iyāñ to saath rahtī haiñ

ye maanā vo samay kī dhuñd meñ gum ho gayā hogā

safar kitnā hasīñ ho 'nāz' ḳhvāboñ kā ḳhayāloñ kā

magar ye silsila phir TuuT kar bikhrā huā hogā

mere ruKHsar par aansu ka qatra ruk gaya hoga

kisi ka ek hasin chehra bahut dhundla gaya hoga

na jaane kis tarah se kar liya apna asir us ne

hamare sath chal kar dur tak wo aa gaya hoga

samundar ki hasin lahren kinare par ruken jaise

wo aise hi meri dahliz par aa kar ruka hoga

mere ashaar ke lafzon ko koi chhu na paega

ki wo ek lafz mere lab pe aa kar ruk gaya hoga

taDap jate hain is miTTi ki KHushbu se kabhi hum to

hai is dharti ka koi qarz jo yaad aa gaya hoga

ye unche unche parbat dur tak phaile hue sae

ye manzar apni yaadon mein zamanon tak raha hoga

kisi manzil pe to shayad bahaaren aa gai hongi

koi to rasta hoga jo phulon se saja hoga

kisi man ke liye kitni kaThin wo ek ghaDi hogi

kisi bachche ka KHun jis waqt miTTi par baha hoga

kisi ki yaad ki parchhaiyan to sath rahti hain

ye mana wo samay ki dhund mein gum ho gaya hoga

safar kitna hasin ho 'naz' KHwabon ka KHayalon ka

magar ye silsila phir TuT kar bikhra hua hoga