mere sath tum bhi dua karo yun kisi ke haq mein bura na ho

mire saath tum bhī du'ā karo yuuñ kisī ke haq meñ burā na ho

kahīñ aur ho na ye hādisa koī rāste meñ judā na ho

sar-e-shām Thahrī huī zamīñ jahāñ āsmāñ hai jhukā huā

usī moḌ par mire vāste vo charāġh le ke khaḌā na ho

mirī chhat se raat kī sej tak koī āñsuoñ kī lakīr hai

zarā baḌh ke chāñd se pūchhnā vo usī taraf se gayā na ho

mujhe yuuñ lagā ki ḳhamosh ḳhushbū ke hoñT titlī ne chhū liye

unhīñ zard pattoñ kī oT meñ koī phuul soyā huā na ho

isī ehtiyāt meñ vo rahā isī ehtiyāt meñ maiñ rahā

vo kahāñ kahāñ mire saath hai kisī aur ko ye pata na ho

vo farishte aap talāsh kariye kahāniyoñ kī kitāb meñ

jo burā kaheñ na burā suneñ koī shaḳhs un se ḳhafā na ho

vo firāq ho ki visāl ho tirī aag mahkegī ek din

vo gulāb ban ke khilegā kyā jo charāġh ban ke jalā na ho

mere sath tum bhi du'a karo yun kisi ke haq mein bura na ho

kahin aur ho na ye hadisa koi raste mein juda na ho

sar-e-sham Thahri hui zamin jahan aasman hai jhuka hua

usi moD par mere waste wo charagh le ke khaDa na ho

meri chhat se raat ki sej tak koi aansuon ki lakir hai

zara baDh ke chand se puchhna wo usi taraf se gaya na ho

mujhe yun laga ki KHamosh KHushbu ke honT titli ne chhu liye

unhin zard patton ki oT mein koi phul soya hua na ho

isi ehtiyat mein wo raha isi ehtiyat mein main raha

wo kahan kahan mere sath hai kisi aur ko ye pata na ho

wo farishte aap talash kariye kahaniyon ki kitab mein

jo bura kahen na bura sunen koi shaKHs un se KHafa na ho

wo firaq ho ki visal ho teri aag mahkegi ek din

wo gulab ban ke khilega kya jo charagh ban ke jala na ho