mere shuur ki gahraiyon ko tolega

mire shu'ūr kī gahrā.iyoñ ko tolegā

phir us ke baa'd vo har ek raaz kholegā

abhī to jhuuT hai mahdūd sirf insāñ tak

vo daur aa.egā jab aa.ina bhī bolegā

pilā do zahr use yā chaḌhā do suulī par

vo shaḳhs sach kā pujārī hai sach hī bolegā

ghaḌā to paap kā kab kā hī bhar chukā yaaro

hilegī kab ye zamīñ kab falak ye Dolegā

laboñ pe jis ke hai 'firdaus' mohr-e-ḳhāmoshī

yaqīn hai ki vo ik roz raaz kholegā

mere shu'ur ki gahraiyon ko tolega

phir us ke ba'd wo har ek raaz kholega

abhi to jhuT hai mahdud sirf insan tak

wo daur aaega jab aaina bhi bolega

pila do zahr use ya chaDha do suli par

wo shaKHs sach ka pujari hai sach hi bolega

ghaDa to pap ka kab ka hi bhar chuka yaro

hilegi kab ye zamin kab falak ye Dolega

labon pe jis ke hai 'firdaus' mohr-e-KHamoshi

yaqin hai ki wo ek roz raaz kholega