mere sine se tera tir jab ai jang-ju nikla

mire siine se terā tiir jab ai jañg-jū niklā

dahān-e-zaḳhm se ḳhuuñ ho ke harf-e-ārzū niklā

mirā ghar terī manzil-gāh ho aise kahāñ taal.e

ḳhudā jaane kidhar kā chāñd aaj ai māh-rū niklā

phirā gar āsmāñ to shauq meñ tere hai sargardāñ

agar ḳhurshīd niklā terā garm-e-justujū niklā

mai-e-ishrat talab karte the nāhaq āsmāñ se ham

vo thā labrez-e-ġham is ḳhum-kade se jo subū niklā

tire aate hī aate kaam āḳhir ho gayā merā

rahī hasrat ki dam merā na tere rū-ba-rū niklā

kahīñ tujh ko na paayā garche ham ne ik jahāñ DhūñDā

phir āḳhir dil hī meñ dekhā baġhal hī meñ se tū niklā

ḳhajil apne gunāhoñ se huuñ maiñ yaañ tak ki jab royā

to jo aañsū mirī āñkhoñ se niklā surḳh-rū niklā

ghise sab nāḳhun-e-tadbīr aur TuuTī sar-e-sozan

magar thā dil meñ jo kāñTā na hargiz vo kabhū niklā

use ayyār paayā yaar samjhe 'zauq' ham jis ko

jise yaañ dost apnā ham ne jaanā vo udū niklā

mere sine se tera tir jab ai jang-ju nikla

dahan-e-zaKHm se KHun ho ke harf-e-arzu nikla

mera ghar teri manzil-gah ho aise kahan tale

KHuda jaane kidhar ka chand aaj ai mah-ru nikla

phira gar aasman to shauq mein tere hai sargardan

agar KHurshid nikla tera garm-e-justuju nikla

mai-e-ishrat talab karte the nahaq aasman se hum

wo tha labrez-e-gham is KHum-kade se jo subu nikla

tere aate hi aate kaam aaKHir ho gaya mera

rahi hasrat ki dam mera na tere ru-ba-ru nikla

kahin tujh ko na paya garche hum ne ek jahan DhunDa

phir aaKHir dil hi mein dekha baghal hi mein se tu nikla

KHajil apne gunahon se hun main yan tak ki jab roya

to jo aansu meri aankhon se nikla surKH-ru nikla

ghise sab naKHun-e-tadbir aur TuTi sar-e-sozan

magar tha dil mein jo kanTa na hargiz wo kabhu nikla

use ayyar paya yar samjhe 'zauq' hum jis ko

jise yan dost apna hum ne jaana wo udu nikla