meri bandagi tujhe de sakegi bajae mani-o-lafz kya

mirī bandagī tujhe de sakegī bajā.e mā'nī-o-lafz kyā

hai mire shu'ūr kī jholiyoñ meñ sivā.e mā'nī-o-lafz kyā

jo nazar kā bojh na sah sakīñ vo zabāñ kā bojh saheñgī kyā

subuk-o-latīf ishāratoñ pe jafā-e-mā'nī-o-lafz kyā

mujhe Dar hai ai suḳhan-āfrīñ ye libās un pe girāñ na ho

jo haqīqateñ na pahan sakīñ vo qabā-e-mā'nī-o-lafz kyā

na vo shams meñ na qamar meñ hai vo hijāb-e-fikr-o-nazar meñ hai

jo hijāb-e-fikr-o-nazar uThā to ġhizā-e-mā'nī-o-lafz kyā

mirī ruuh agarche hai gurasna mirā shauq agarche hai jāñ-ba-lab

magar ai jamīl-e-ġhazal-sarā ye ridā-e-mā'nī-o-lafz kyā

meri bandagi tujhe de sakegi bajae ma'ni-o-lafz kya

hai mere shu'ur ki jholiyon mein siwae ma'ni-o-lafz kya

jo nazar ka bojh na sah sakin wo zaban ka bojh sahengi kya

subuk-o-latif ishaaraton pe jafa-e-ma'ni-o-lafz kya

mujhe Dar hai ai suKHan-afrin ye libas un pe giran na ho

jo haqiqaten na pahan sakin wo qaba-e-ma'ni-o-lafz kya

na wo shams mein na qamar mein hai wo hijab-e-fikr-o-nazar mein hai

jo hijab-e-fikr-o-nazar uTha to ghiza-e-ma'ni-o-lafz kya

meri ruh agarche hai gurasna mera shauq agarche hai jaan-ba-lab

magar ai jamil-e-ghazal-sara ye rida-e-ma'ni-o-lafz kya