meri chahaton ka sila de rahe ho

mirī chāhatoñ kā sila de rahe ho

yuuñ lagtā hai jaise sazā de rahe ho

na sāhil na sāhil ke āsār tak haiñ

dilāse abas nāḳhudā de rahe ho

adāoñ ishāroñ se lagtā hai jaise

koī zaḳhm phir se nayā de rahe ho

yahāñ har koī ḳhud meñ Duubā hai gum hai

divāne kise tum sadā de rahe ho

mirī jaan māñgā thā kuchh aur maiñ ne

ġham-e-hijr phir se ye kyā de rahe ho

mohabbat sikhā dī tumheñ jis ne us ko

vafā ke bajā.e daġhā de rahe ho

baḌī muddatoñ ba.ad sho.ale bujhe haiñ

tum is aag ko phir havā de rahe ho

kahīñ vo havāoñ kā haamī na nikle

jise apnā 'farhat' diyā de rahe ho

meri chahaton ka sila de rahe ho

yun lagta hai jaise saza de rahe ho

na sahil na sahil ke aasar tak hain

dilase abas naKHuda de rahe ho

adaon ishaaron se lagta hai jaise

koi zaKHm phir se naya de rahe ho

yahan har koi KHud mein Duba hai gum hai

diwane kise tum sada de rahe ho

meri jaan manga tha kuchh aur main ne

gham-e-hijr phir se ye kya de rahe ho

mohabbat sikha di tumhein jis ne us ko

wafa ke bajae dagha de rahe ho

baDi muddaton baad shoale bujhe hain

tum is aag ko phir hawa de rahe ho

kahin wo hawaon ka hami na nikle

jise apna 'farhat' diya de rahe ho