meri judai mein aansu bahae jate hain

mirī judā.ī meñ aañsū bahā.e jaate haiñ

ye fitna merī lahad par jagā.e jaate haiñ

ziyā-e-husn ko dargāh-e-dil tarastī hai

charāġh dair-o-haram meñ jalā.e jaate haiñ

nahīñ satāte kisī ko bhī jo zamāne meñ

vahī zamāne meñ aksar satā.e jaate haiñ

ziyā-e-husn se hotā hai jin kā dil ma.amūr

charāġh gor par un kī jalā.e jaate haiñ

fasānoñ se nahīñ bantīñ haqīqateñ lekin

haqīqatoñ se fasāne banā.e jaate haiñ

kahīñ ġhurūr takabbur kahīñ futūr-e-ḳhudī

hamārī raah meñ rahzan biThā.e jaate haiñ

adab kī mahfil-e-rañgīñ meñ rāt-din 'fāriġh'

mire fasāne hī aksar sunā.e jaate haiñ

meri judai mein aansu bahae jate hain

ye fitna meri lahad par jagae jate hain

ziya-e-husn ko dargah-e-dil tarasti hai

charagh dair-o-haram mein jalae jate hain

nahin satate kisi ko bhi jo zamane mein

wahi zamane mein aksar satae jate hain

ziya-e-husn se hota hai jin ka dil mamur

charagh gor par un ki jalae jate hain

fasanon se nahin bantin haqiqaten lekin

haqiqaton se fasane banae jate hain

kahin ghurur takabbur kahin futur-e-KHudi

hamari rah mein rahzan biThae jate hain

adab ki mahfil-e-rangin mein raat-din 'farigh'

mere fasane hi aksar sunae jate hain