meri kar-gah-e-dil mein abhi kaam hai ziyaada

mirī kār-gāh-e-dil meñ abhī kaam hai ziyāda

koī chiiz ik jagah se zarā ḳhaam hai ziyāda

kisī manzar-e-shafaq ko kahāñ aañkh meñ jagah duuñ

mire ḳhūn-e-dil se rangīñ mirī shaam hai ziyāda

ghaḌī-bhar Thaharne vaale zarā ye ḳhayāl rakhnā

ye jo sāya-e-shajar hai koī daam hai ziyāda

mirā mashvara yahī hai isī rāste se jaanā

baḌā saaf hai agarche ka.ī gaam hai ziyāda

paḌe haiñ bahut se mere abhī kaam nā-mukammal

koī bojh jaate din par sar-e-shām hai ziyāda

koī jurm dūsre kā mirā ban gayā hai kaise

tirī fard-e-jurm meñ kyuuñ mirā naam hai ziyāda

kabhī kūcha-e-talab meñ kabhī rāh-e-zar-garī par

tirā kār-e-husn ab kuchh sar-e-'ām hai ziyāda

tirī aañkh meñ jo 'shāhīñ' labā-lab bharā huā hai

kisī ik taraf se ḳhālī vahīñ jaam hai ziyāda

meri kar-gah-e-dil mein abhi kaam hai ziyaada

koi chiz ek jagah se zara KHam hai ziyaada

kisi manzar-e-shafaq ko kahan aankh mein jagah dun

mere KHun-e-dil se rangin meri sham hai ziyaada

ghaDi-bhar Thaharne wale zara ye KHayal rakhna

ye jo saya-e-shajar hai koi dam hai ziyaada

mera mashwara yahi hai isi raste se jaana

baDa saf hai agarche kai gam hai ziyaada

paDe hain bahut se mere abhi kaam na-mukammal

koi bojh jate din par sar-e-sham hai ziyaada

koi jurm dusre ka mera ban gaya hai kaise

teri fard-e-jurm mein kyun mera nam hai ziyaada

kabhi kucha-e-talab mein kabhi rah-e-zar-gari par

tera kar-e-husn ab kuchh sar-e-'am hai ziyaada

teri aankh mein jo 'shahin' laba-lab bhara hua hai

kisi ek taraf se KHali wahin jam hai ziyaada