meri koshish hai gham apna zamane se chhupa lun main

mirī koshish hai ġham apnā zamāne se chhupā luuñ maiñ

kahīñ ḳhalvat meñ tanhā baiTh kar aañsū bahā luuñ maiñ

kisī jangal meñ jākar sochtā huuñ ghar banā luuñ maiñ

ye duniyā chhoḌ duuñ aur ik na.ī duniyā basā luuñ maiñ

banī-ādam se lagte haiñ bhale mujh ko pashū panchhī

bachī hai umr jo behtar hai saath un ke bitā luuñ maiñ

nahīñ manzūr muhtājī mujhe hargiz zamāne kī

chale gar bas mirā mayyat bhī apnī ḳhud uThā luuñ maiñ

jo siine meñ machalte haiñ magar lab tak nahīñ aa.e

qazā kuchh roz Thahre to vo naġhme bhī sunā luuñ maiñ

karūñ raazī dil-e-muztar ko kis tarkīb se āḳhir

koī bachcha nahīñ jis ko khilaunoñ se manā luuñ maiñ

ye had hai be-hayā.ī kī ki gulshan jal rahā hai aur

mujhe ye fikr hai bas āshiyāñ apnā bachā luuñ maiñ

ye māyā-jāl jo maiñ ne bunā hai ird-gird apne

'sadā' is jaal se ḳhud ko uff ab kaise nikālūñ maiñ

meri koshish hai gham apna zamane se chhupa lun main

kahin KHalwat mein tanha baiTh kar aansu baha lun main

kisi jangal mein jakar sochta hun ghar bana lun main

ye duniya chhoD dun aur ek nai duniya basa lun main

bani-adam se lagte hain bhale mujh ko pashu panchhi

bachi hai umr jo behtar hai sath un ke bita lun main

nahin manzur muhtaji mujhe hargiz zamane ki

chale gar bas mera mayyat bhi apni KHud uTha lun main

jo sine mein machalte hain magar lab tak nahin aae

qaza kuchh roz Thahre to wo naghme bhi suna lun main

karun raazi dil-e-muztar ko kis tarkib se aaKHir

koi bachcha nahin jis ko khilaunon se mana lun main

ye had hai be-hayai ki ki gulshan jal raha hai aur

mujhe ye fikr hai bas aashiyan apna bacha lun main

ye maya-jal jo main ne buna hai ird-gird apne

'sada' is jal se KHud ko uff ab kaise nikalun main