meri nazar se guzarne wale payam kab tak salam kab tak

mirī nazar se guzarne vaale payām kab tak salām kab tak

ināyat-e-dilbarī kahāñ tak navāzish-e-ḳhās-o-ām kab tak

ye fursat-e-ehtimām kab tak ye zahmat-e-gām-gām kab tak

ye dil kī duniyā-e-narm-o-nāzuk rahegī mashq-e-ḳhirām kab tak

payām aate raheñge āḳhir asīr-e-ulfat ke naam kab tak

ye iztirāb-e-ġham-e-mohabbat rahegā yuuñ tishna-kām kab tak

ye mahkā mahkā sā kaif-sāmāñ shabāb terā sharāb merī

bharī nazar se pilāne vaale ye zahmat-e-jām-jām kab tak

na merī manzil na merā jaada mazāq-e-fitrat ye kyā tamāshā

ḳhirad kī ye gum-rahī kahāñ tak junūñ kā ye faiz-e-ām kab tak

ye terā raushan sā ek aalam ye merī tārīkī-e-shab-e-ġham

tire hī jalvoñ se pūchhtā huuñ ye sub.h kab tak ye shaam kab tak

mirī tamanna bhī aur kab tak rahīn-e-zauq-e-talab rahegī

mirī mohabbat mirā hī jiinā karegī mujh par harām kab tak

kisī kā le kar bhī naam duniyā kabhī to āḳhir karegī charche

rahegā merā hī naam 'mushkil' zabāñ-zad-e-ḳhās-o-ām kab tak tak

meri nazar se guzarne wale payam kab tak salam kab tak

inayat-e-dilbari kahan tak nawazish-e-KHas-o-am kab tak

ye fursat-e-ehtimam kab tak ye zahmat-e-gam-gam kab tak

ye dil ki duniya-e-narm-o-nazuk rahegi mashq-e-KHiram kab tak

payam aate rahenge aaKHir asir-e-ulfat ke nam kab tak

ye iztirab-e-gham-e-mohabbat rahega yun tishna-kaam kab tak

ye mahka mahka sa kaif-saman shabab tera sharab meri

bhari nazar se pilane wale ye zahmat-e-jam-jam kab tak

na meri manzil na mera jada mazaq-e-fitrat ye kya tamasha

KHirad ki ye gum-rahi kahan tak junun ka ye faiz-e-am kab tak

ye tera raushan sa ek aalam ye meri tariki-e-shab-e-gham

tere hi jalwon se puchhta hun ye subh kab tak ye sham kab tak

meri tamanna bhi aur kab tak rahin-e-zauq-e-talab rahegi

meri mohabbat mera hi jina karegi mujh par haram kab tak

kisi ka le kar bhi nam duniya kabhi to aaKHir karegi charche

rahega mera hi nam 'mushkil' zaban-zad-e-KHas-o-am kab tak tak