meri nigah hai ab mujh pe aainon ki tarah

mirī nigāh hai ab mujh pe ā.inoñ kī tarah

tabhī to dekhtī huuñ ḳhud ko dūsroñ kī tarah

vo apnī pyaas kā 'ālam bhī maiñ ne dekhā hai

maiñ apne aap pe barsī huuñ bārishoñ kī tarah

maiñ manziloñ pe Thaharnā kabhī na siikh sakī

safar maiñ kartī rahī sirf rāstoñ kī tarah

hai mere roz ke mā'mūl kā asar mujh par

maiñ ḳhud ko jiine lagī huuñ ab 'ādatoñ kī tarah

vo vahshatoñ kā samāñ thā koī milā hī nahīñ

maiñ apne aap se pesh aa.ī pāgaloñ kī tarah

vafā kā is se ziyāda subūt kyā detī

maiñ raakh ho to ga.ī us kī ciggarettoñ kī tarah

meri nigah hai ab mujh pe aainon ki tarah

tabhi to dekhti hun KHud ko dusron ki tarah

wo apni pyas ka 'alam bhi main ne dekha hai

main apne aap pe barsi hun barishon ki tarah

main manzilon pe Thaharna kabhi na sikh saki

safar main karti rahi sirf raston ki tarah

hai mere roz ke ma'mul ka asar mujh par

main KHud ko jine lagi hun ab 'adaton ki tarah

wo wahshaton ka saman tha koi mila hi nahin

main apne aap se pesh aai pagalon ki tarah

wafa ka is se ziyaada subut kya deti

main rakh ho to gai us ki ciggaretton ki tarah