meri nigah mein sud-o-ziyan nahin kuchh bhi

mirī nigāh meñ sūd-o-ziyāñ nahīñ kuchh bhī

vahāñ milegā agarche yahāñ nahīñ kuchh bhī

vo mere sāmne hai maiñ nazar meñ huuñ us kī

ab us ke aur mire darmiyāñ nahīñ kuchh bhī

ye kis maqām pe aaya huuñ maiñ ḳhudā jaane

na lab-kushā hai koī īn-o-āñ nahīñ kuchh bhī

ba-rū-e-kār hai jab se ye merā sabr-e-jamīl

mirī nazar meñ ġham-e-bekarāñ nahīñ kuchh bhī

kis ahraman ne diloñ ko siyāh kar Daalā

bashar ke kaan meñ bāñg-e-azāñ nahīñ kuchh bhī

agar ho sa.ī-e-sadāqat ba-nām-e-azm-o-amal

mujhe yaqīñ hai ki phir rā.egāñ nahīñ kuchh bhī

ye terī shān-e-karīmī ye terī jalvagarī

har ek shai se ayaañ hai nihāñ nahīñ kuchh bhī

jo baat dil meñ utar jaa.e vo bayāñ kījiye

jo dil kī tah meñ na utre bayāñ nahīñ kuchh bhī

bashar ko izn hai tasḳhīr-e-kā.enāt kare

ye āsmāñ ye zamīñ kahkashāñ nahīñ kuchh bhī

tire karam kī badaulat hai amn aalam meñ

tirā karam na ho nazm-e-jahāñ nahīñ kuchh bhī

tū apnī shīrīñ-kalāmī se kaam le le agar

to phir zamāne kī ye talḳhiyāñ nahīñ kuchh bhī

jahān-e-ishq meñ haiñ āzmā.isheñ kyā kyā

abhī to 'yās' tirā imtihāñ nahīñ kuchh bhī

meri nigah mein sud-o-ziyan nahin kuchh bhi

wahan milega agarche yahan nahin kuchh bhi

wo mere samne hai main nazar mein hun us ki

ab us ke aur mere darmiyan nahin kuchh bhi

ye kis maqam pe aaya hun main KHuda jaane

na lab-kusha hai koi in-o-an nahin kuchh bhi

ba-ru-e-kar hai jab se ye mera sabr-e-jamil

meri nazar mein gham-e-bekaran nahin kuchh bhi

kis ahraman ne dilon ko siyah kar Dala

bashar ke kan mein bang-e-azan nahin kuchh bhi

agar ho sai-e-sadaqat ba-nam-e-azm-o-amal

mujhe yaqin hai ki phir raegan nahin kuchh bhi

ye teri shan-e-karimi ye teri jalwagari

har ek shai se ayan hai nihan nahin kuchh bhi

jo baat dil mein utar jae wo bayan kijiye

jo dil ki tah mein na utre bayan nahin kuchh bhi

bashar ko izn hai tasKHir-e-kaenat kare

ye aasman ye zamin kahkashan nahin kuchh bhi

tere karam ki badaulat hai amn aalam mein

tera karam na ho nazm-e-jahan nahin kuchh bhi

tu apni shirin-kalami se kaam le le agar

to phir zamane ki ye talKHiyan nahin kuchh bhi

jahan-e-ishq mein hain aazmaishen kya kya

abhi to 'yas' tera imtihan nahin kuchh bhi