meri nigah mein ye charKH-e-aKHzari kya hai

mirī nigāh meñ ye charḳh-e-aḳhzarī kyā hai

ye mehr-o-māh ye tāroñ kī rahbarī kyā hai

ye nāz-o-ishva-o-tyorī sitamgarī kyā hai

taḌap na jaa.e agar dil to dilbarī kyā hai

banā.eñ aap mire dil ko aa.ina lekin

samajh to lījiye pahle sikandarī kyā hai

vafā.eñ ho ga.iiñ qurbān un jafāoñ par

tumhī batāo ye andāz-e-dilbarī kyā hai

yuuñ bazm-e-nāz meñ aane ke ham nahīñ qaa.il

na ho salām-e-mohabbat to hāzirī kyā hai

nigāh-e-nāz kā kushta huā jab avval-e-shab

mirī nazar meñ ye jādū-e-sāmrī kyā hai

janāb-e-shaiḳh bhī baiThe the but-kade meñ kal

bahas chhiḌī thī unhī se ki kāfirī kyā hai

amal nahīñ to ye alqāb sab haiñ nākāra

ye shaiḳh-o-sayyad-o-afġhān-o-ja.afrī kyā hai

nikālte haiñ mujhe bazm-e-ahl-e-suḳhnāñ se

ḳhabar nahīñ jinheñ ādāb-e-shā.erī kyā hai

na qadr-e-la.al na kuchh ābrū-e-gauhar hai

badūñ tamīz-e-guhar zo.am-e-jauharī kyā hai

ye ahl-e-bazm kā husn-e-samā.at hai 'dīvān'

vagarna ahl-e-zabāñ meñ ye shā.erī kyā hai

meri nigah mein ye charKH-e-aKHzari kya hai

ye mehr-o-mah ye taron ki rahbari kya hai

ye naz-o-ishwa-o-tyori sitamgari kya hai

taDap na jae agar dil to dilbari kya hai

banaen aap mere dil ko aaina lekin

samajh to lijiye pahle sikandari kya hai

wafaen ho gain qurban un jafaon par

tumhi batao ye andaz-e-dilbari kya hai

yun bazm-e-naz mein aane ke hum nahin qail

na ho salam-e-mohabbat to haziri kya hai

nigah-e-naz ka kushta hua jab awwal-e-shab

meri nazar mein ye jadu-e-samri kya hai

janab-e-shaiKH bhi baiThe the but-kade mein kal

bahas chhiDi thi unhi se ki kafiri kya hai

amal nahin to ye alqab sab hain nakara

ye shaiKH-o-sayyad-o-afghan-o-jafri kya hai

nikalte hain mujhe bazm-e-ahl-e-suKHnan se

KHabar nahin jinhen aadab-e-shaeri kya hai

na qadr-e-lal na kuchh aabru-e-gauhar hai

badun tamiz-e-guhar zoam-e-jauhari kya hai

ye ahl-e-bazm ka husn-e-samaat hai 'diwan'

wagarna ahl-e-zaban mein ye shaeri kya hai