meri qurbaton ki KHatir yunhi be-qarar hota

mirī qurbatoñ kī ḳhātir yūñhī be-qarār hotā

jo mirī tarah use bhī kahīñ mujh se pyaar hotā

na vo is tarah badalte na nigāh pher lete

jo na bebasī kā merī unheñ e'tibār hotā

vo kuchh aise Dhaltā mujh meñ ki ġham us ke mere hote

vo jo sogvār hotā to maiñ ashk-bār hotā

mujhe chain lene detī kahāñ inqilābī fitrat

na musāhiboñ meñ hotā na maiñ shah kā yaar hotā

maiñ usī ke naam kartā ye hayāt maut sab kuchh

mujhe zindagī pe 'ālok' agar iḳhtiyār hotā

meri qurbaton ki KHatir yunhi be-qarar hota

jo meri tarah use bhi kahin mujh se pyar hota

na wo is tarah badalte na nigah pher lete

jo na bebasi ka meri unhen e'tibar hota

wo kuchh aise Dhalta mujh mein ki gham us ke mere hote

wo jo sogwar hota to main ashk-bar hota

mujhe chain lene deti kahan inqilabi fitrat

na musahibon mein hota na main shah ka yar hota

main usi ke nam karta ye hayat maut sab kuchh

mujhe zindagi pe 'alok' agar iKHtiyar hota