meri sachchai har surat teri muTThi se niklegi

mirī sachchā.ī har sūrat tirī muTThī se niklegī

añgūThī gir ke dariyā meñ kisī machhlī se niklegī

faqīroñ ko tū apnī shān-o-shaukat kyā dikhātā hai

hukūmat saare aalam kī mirī gaThrī se niklegī

maiñ tanhā hī nahīñ jo be-sabab sach bol dete haiñ

ye bīmārī ġharīboñ kī har ik bastī se niklegī

inhīñ zaḳhmoñ ko mere dard kā baa.is na jaano tum

nishānī aur bhī ujḌī huī dillī se niklegī

mohabbat kī bulandī paar kar ke tum kabhī dekho

anal-haq kī sadā bahtī huī lakḌī se niklegī

ġharībī duur karne āsmāñ se kaun aa.egā

ḳhazāne se bharī gagrī isī miTTī se niklegī

abhī do-chār jumloñ se bharā kāġhaz kā TukḌā hai

ḳhizāñ aane do phir ḳhushbū mirī chiTThī se niklegī

qarābat to mayassar hai magar ye dil kī tanhā.ī

mirī marzī se aa.ī hai mirī marzī se niklegī

añdherā dekhnā ḳhud le ke aa.egā diyā merā

kisī din raushnī 'sāgar' isī āñdhī se niklegī

meri sachchai har surat teri muTThi se niklegi

anguThi gir ke dariya mein kisi machhli se niklegi

faqiron ko tu apni shan-o-shaukat kya dikhata hai

hukumat sare aalam ki meri gaThri se niklegi

main tanha hi nahin jo be-sabab sach bol dete hain

ye bimari gharibon ki har ek basti se niklegi

inhin zaKHmon ko mere dard ka bais na jaano tum

nishani aur bhi ujDi hui dilli se niklegi

mohabbat ki bulandi par kar ke tum kabhi dekho

anal-haq ki sada bahti hui lakDi se niklegi

gharibi dur karne aasman se kaun aaega

KHazane se bhari gagri isi miTTi se niklegi

abhi do-chaar jumlon se bhara kaghaz ka TukDa hai

KHizan aane do phir KHushbu meri chiTThi se niklegi

qarabat to mayassar hai magar ye dil ki tanhai

meri marzi se aai hai meri marzi se niklegi

andhera dekhna KHud le ke aaega diya mera

kisi din raushni 'sagar' isi aandhi se niklegi