meri tarikiyon se bhagta main

mirī tārīkiyoñ se bhāgtā maiñ

tumhārī raushnī se aa lagā maiñ

diye jaisā badan Dhāñpe hue thā

havā hone kā dam bhartā huā maiñ

hazāroñ peḌ haiñ is dasht meñ aur

hazāroñ meñ kahīñ tanhā khaḌā maiñ

badan huuñ ruuh ke is dā.ere meñ

aur apnī ruuh kā huuñ dā.era maiñ

havā meñ jazb paanī sokh lūñgā

tumhārī ḳhaak se lipTā huā maiñ

mire siine se lag kar so gayā vo

use siine lagā kar jāgtā maiñ

abhī dastak sunī maiñ ne lihāzā

badan ke sab daroñ ko kholtā maiñ

tirī bātoñ ko sunñā bhuul baiThā

tirī bātoñ meñ itnā mubtalā maiñ

tū jab tak saath hai merā ḳhudā hai

aur us ke baad huuñ apnā ḳhudā maiñ

meri tarikiyon se bhagta main

tumhaari raushni se aa laga main

diye jaisa badan Dhanpe hue tha

hawa hone ka dam bharta hua main

hazaron peD hain is dasht mein aur

hazaron mein kahin tanha khaDa main

badan hun ruh ke is daere mein

aur apni ruh ka hun daera main

hawa mein jazb pani sokh lunga

tumhaari KHak se lipTa hua main

mere sine se lag kar so gaya wo

use sine laga kar jagta main

abhi dastak suni main ne lihaza

badan ke sab daron ko kholta main

teri baaton ko sunna bhul baiTha

teri baaton mein itna mubtala main

tu jab tak sath hai mera KHuda hai

aur us ke baad hun apna KHuda main