meri tarah ka koi shaKHs mar gaya mujh mein

mirī tarah kā koī shaḳhs mar gayā mujh meñ

tire vujūd kā ehsās bhar gayā mujh meñ

'ajīb gard-e-rah-e-shauq jam ga.ī lab par

'ajīb zauq-e-safar sā Thahar gayā mujh meñ

kisī parind kī chīḳhoñ ne sang-bārī kī

sukūt-e-shām kā shīsha bikhar gayā mujh meñ

havā-e-dard chalī dil kī khiḌkiyāñ khaTkīñ

makīn-e-goshā-e-ummīd Dar gayā mujh meñ

har ek samt tirī yaad kā dhuñdalkā hai

tire ḳhayāl kā sūraj utar gayā mujh meñ

talāsh-e-saut-o-sadā meñ kidhar gayā maiñ 'arsh'

vo naghma-sāz-e-khamoshī kidhar gayā mujh meñ

meri tarah ka koi shaKHs mar gaya mujh mein

tere wujud ka ehsas bhar gaya mujh mein

'ajib gard-e-rah-e-shauq jam gai lab par

'ajib zauq-e-safar sa Thahar gaya mujh mein

kisi parind ki chiKHon ne sang-bari ki

sukut-e-sham ka shisha bikhar gaya mujh mein

hawa-e-dard chali dil ki khiDkiyan khaTkin

makin-e-gosha-e-ummid Dar gaya mujh mein

har ek samt teri yaad ka dhundalka hai

tere KHayal ka suraj utar gaya mujh mein

talash-e-saut-o-sada mein kidhar gaya main 'arsh'

wo naghma-saz-e-khamoshi kidhar gaya mujh mein