meri tarah se kahin KHak chhanta hoga

mirī tarah se kahīñ ḳhaak chhāntā hogā

vo apnī zaat ke sahrā meñ kho gayā hogā

sharār raakh meñ baaqī rahā nahīñ koī

charāġh dil kā mire jal ke bujh gayā hogā

jo merī jhiil sī āñkhoñ meñ Duub Duub gayā

sitāra-vār kahīñ ḳhud ko DhūñDhtā hogā

phir aaj qarya-e-jāñ par azaab utre haiñ

kisī ne phir nayā tarkash sajā liyā hogā

chhalakte jaate haiñ manzar tamām āñkhoñ se

darīcha yaad kā shāyad koī khulā hogā

samā.atoñ pe mirī aaj kaisī dastak hai

koī havā se patā merā pūchhtā hogā

vo shaḳhs merā shanāsā nahīñ to kaun hai vo

kisī ko DhūñDhtā rasta bhaTak gayā hogā

nafas nafas meñ koī āshkār hotā hai

jo mere dil ke qarīñ hai mirā ḳhudā hogā

tirī talāsh meñ vo muntashir huā aisā

surāġh apnā bhī us ko na mil sakā hogā

badaltī rut meñ vo kaisā badal gayā 'shahnāz'

bichhaḌ ke mujh se kabhī vo bhī sochtā hogā

meri tarah se kahin KHak chhanta hoga

wo apni zat ke sahra mein kho gaya hoga

sharar rakh mein baqi raha nahin koi

charagh dil ka mere jal ke bujh gaya hoga

jo meri jhil si aankhon mein Dub Dub gaya

sitara-war kahin KHud ko DhunDhta hoga

phir aaj qarya-e-jaan par azab utre hain

kisi ne phir naya tarkash saja liya hoga

chhalakte jate hain manzar tamam aankhon se

daricha yaad ka shayad koi khula hoga

samaaton pe meri aaj kaisi dastak hai

koi hawa se pata mera puchhta hoga

wo shaKHs mera shanasa nahin to kaun hai wo

kisi ko DhunDhta rasta bhaTak gaya hoga

nafas nafas mein koi aashkar hota hai

jo mere dil ke qarin hai mera KHuda hoga

teri talash mein wo muntashir hua aisa

suragh apna bhi us ko na mil saka hoga

badalti rut mein wo kaisa badal gaya 'shahnaz'

bichhaD ke mujh se kabhi wo bhi sochta hoga