meri wafa ka tera lutf bhi jawab nahin

mirī vafā kā tirā lutf bhī javāb nahīñ

mire shabāb kī qīmat tirā shabāb nahīñ

ye māhtāb nahīñ hai ki āftāb nahīñ

sabhī hai husn magar ishq kā javāb nahīñ

mirī nigāh meñ jalve haiñ jalve hī jalve

yahāñ hijāb nahīñ hai yahāñ naqāb nahīñ

junūñ bhī had se sivā shauq bhī hai had se sivā

ye baat kyā hai ki maiñ maurid-e-itāb nahīñ

yahāñ to husn kā dil bhī hai ġham se sad paara

maiñ kāmyāb nahīñ vo bhī kāmyāb nahīñ

yahāñ to raat kī bedāriyāñ musallam haiñ

magar vahāñ bhī hasīñ añkhḌiyoñ meñ ḳhvāb nahīñ

na pūchhiye mirī duniyā ko merī duniyā meñ

ḳhud āftāb bhī zarra hai āftāb nahīñ

sab hī haiñ mai-kada-e-dahr meñ ḳhirad vaale

koī ḳharāb nahīñ hai koī ḳharāb nahīñ

'majāz' kis ko maiñ samjhā.ūñ koī kyā samjhe

ki kāmyāb-e-mohabbat bhī kāmyāb nahīñ

meri wafa ka tera lutf bhi jawab nahin

mere shabab ki qimat tera shabab nahin

ye mahtab nahin hai ki aaftab nahin

sabhi hai husn magar ishq ka jawab nahin

meri nigah mein jalwe hain jalwe hi jalwe

yahan hijab nahin hai yahan naqab nahin

junun bhi had se siwa shauq bhi hai had se siwa

ye baat kya hai ki main maurid-e-itab nahin

yahan to husn ka dil bhi hai gham se sad para

main kaamyab nahin wo bhi kaamyab nahin

yahan to raat ki bedariyan musallam hain

magar wahan bhi hasin ankhDiyon mein KHwab nahin

na puchhiye meri duniya ko meri duniya mein

KHud aaftab bhi zarra hai aaftab nahin

sab hi hain mai-kada-e-dahr mein KHirad wale

koi KHarab nahin hai koi KHarab nahin

'majaz' kis ko main samjhaun koi kya samjhe

ki kaamyab-e-mohabbat bhi kaamyab nahin