meri zamin tere aasman se behtar hai

mirī zamīn tire āsmāñ se behtar hai

yaqīñ yaqīñ hai kisī bhī gumāñ se behtar hai

kahāñ nahīñ hai tū jalva-numā ḳhudā mere

ye lā-makānī tirī har makāñ se behtar hai

maiñ us ke saath diloñ ke safar pe rahtā huuñ

ḳhayāl us kā kisī kārvāñ se behtar hai

zarā sā vaqt hai is kā rahe ḳhayāl tumheñ

vahīñ se qissa sunāo jahāñ se behtar hai

guzārī umr hī ab tak na aayā jiinā hameñ

hamārī zindagī jaane kahāñ se behtar hai

duā.eñ denā kisī ko shi.ār ḳhuub sahī

duā.eñ lenā magar apnī maañ se behtar hai

sikhā.e vo use jannat hai jis ke qadmoñ meñ

zabān-e-mādrī har ik zabāñ se behtar hai

meri zamin tere aasman se behtar hai

yaqin yaqin hai kisi bhi guman se behtar hai

kahan nahin hai tu jalwa-numa KHuda mere

ye la-makani teri har makan se behtar hai

main us ke sath dilon ke safar pe rahta hun

KHayal us ka kisi karwan se behtar hai

zara sa waqt hai is ka rahe KHayal tumhein

wahin se qissa sunao jahan se behtar hai

guzari umr hi ab tak na aaya jina hamein

hamari zindagi jaane kahan se behtar hai

duaen dena kisi ko shiar KHub sahi

duaen lena magar apni man se behtar hai

sikhae wo use jannat hai jis ke qadmon mein

zaban-e-madri har ek zaban se behtar hai