meri zindagi ki kitab mein yahi naqsh hain mah-o-sal ke

mirī zindagī kī kitāb meñ yahī naqsh haiñ mah-o-sāl ke

vo shagufta rang 'urūj ke ye shikasta rang zavāl ke

tire husn se mire 'ishq tak ye jo nisbatoñ ke haiñ silsile

ye shajar haiñ ek hī baaġh ke ye samar haiñ ek hī Daal ke

maiñ sunā.ūñ kyā koī dāstāñ ki subūt-e-ġham bhī nahīñ rahā

mire 'ishq naame ko le gayā koī tāq-e-jāñ se nikāl ke

mire baaġh meñ vo gulāb thā ki mahak rahā thā chaman chaman

vo jo gum huā to bikhar ga.e sabhī rang huzn-o-malāl ke

koī ḳhvāb hai na ḳhayāl hai koī aarzū hai na justujū

ye kahāñ hai lā ke biThā diyā mujhe qaid-e-jāñ se nikāl ke

maiñ bhaTak rahā thā jihat jihat tire naqsh-e-pā kī talāsh meñ

mire saath saath chalā kiye ka.ī 'aks ḳhvāb-o-ḳhayāl ke

mujhe shāhrāh-e-hayāt par ka.ī aise ghar bhī mile 'ziyā'

jahāñ qumqume na jale kabhī na vo hijr ke na visāl ke

meri zindagi ki kitab mein yahi naqsh hain mah-o-sal ke

wo shagufta rang 'uruj ke ye shikasta rang zawal ke

tere husn se mere 'ishq tak ye jo nisbaton ke hain silsile

ye shajar hain ek hi bagh ke ye samar hain ek hi Dal ke

main sunaun kya koi dastan ki subut-e-gham bhi nahin raha

mere 'ishq name ko le gaya koi taq-e-jaan se nikal ke

mere bagh mein wo gulab tha ki mahak raha tha chaman chaman

wo jo gum hua to bikhar gae sabhi rang huzn-o-malal ke

koi KHwab hai na KHayal hai koi aarzu hai na justuju

ye kahan hai la ke biTha diya mujhe qaid-e-jaan se nikal ke

main bhaTak raha tha jihat jihat tere naqsh-e-pa ki talash mein

mere sath sath chala kiye kai 'aks KHwab-o-KHayal ke

mujhe shahrah-e-hayat par kai aise ghar bhi mile 'ziya'

jahan qumqume na jale kabhi na wo hijr ke na visal ke