meri zindagi ki sabil par kahin Khaar tha kahin phul tha

mirī zindagī kī sabīl par kahīñ ḳhaar thā kahīñ phuul thā

kabhī chal ke ruknā fuzūl thā kabhī ruk ke chalnā fuzūl thā

tahī-dast maiñ hī khaḌā rahā tirī rah pe varna ai zindagī

kisī haath meñ koī qadr thī kisī sar pe koī usuul thā

ghane bargadoñ kī latāfatoñ pe zavābitoñ kī fasīl thī

mirā zaḳhm jis pe thā munkashif koī ḳhār-dār babūl thā

tire saath jo kaTī zindagī vo tirī hī tarah sapāT thī

na ġham-e-shikast-o-tazī thā na lihāz-e-fat.h-o-husūl thā

mirā din thā tujh pe ayaañ ayaañ tirī shab thī mujh pe khulī khulī

tirā qurb mujh ko aziiz thā mirā hijr tujh ko qubūl thā

maiñ bikhar bikhar ke simaT gayā tū simaT simaT ke bikhar ga.ī

mire pīchhe tū bhī thī muzmahil tire pīchhe maiñ bhī malūl thā

meri zindagi ki sabil par kahin KHar tha kahin phul tha

kabhi chal ke rukna fuzul tha kabhi ruk ke chalna fuzul tha

tahi-dast main hi khaDa raha teri rah pe warna ai zindagi

kisi hath mein koi qadr thi kisi sar pe koi usul tha

ghane bargadon ki latafaton pe zawabiton ki fasil thi

mera zaKHm jis pe tha munkashif koi KHar-dar babul tha

tere sath jo kaTi zindagi wo teri hi tarah sapaT thi

na gham-e-shikast-o-tazi tha na lihaz-e-fath-o-husul tha

mera din tha tujh pe ayan ayan teri shab thi mujh pe khuli khuli

tera qurb mujh ko aziz tha mera hijr tujh ko qubul tha

main bikhar bikhar ke simaT gaya tu simaT simaT ke bikhar gai

mere pichhe tu bhi thi muzmahil tere pichhe main bhi malul tha