misal-e-mauj-e-nasim-e-bahaar guzri hai

misāl-e-mauj-e-nasīm-e-bahār guzrī hai

vo zindagī jo sar-e-kū-e-yār guzrī hai

vo ik nigāh jo paiġhām-e-sad-nashāt bhī hai

na jaane kyoñ vo mire dil pe baar guzrī hai

vo tishnagī jo sar-e-mai-kada nikharnā thī

vo tishnagī bhī yūñhī be-bahār guzrī hai

abhī abhī to na aa ai ḳhayāl-e-āmad-e-yār

abhī abhī to shab-e-intizār guzrī hai

hameñ to un kī nigāhoñ kā e.atibār nahīñ

jo kah rahe haiñ idhar se bahār guzrī hai

tamām umr kiyā un kā intizār 'aḳhtar'

tamām umr baḌī be-qarār guzrī hai

misal-e-mauj-e-nasim-e-bahaar guzri hai

wo zindagi jo sar-e-ku-e-yar guzri hai

wo ek nigah jo paigham-e-sad-nashat bhi hai

na jaane kyon wo mere dil pe bar guzri hai

wo tishnagi jo sar-e-mai-kada nikharna thi

wo tishnagi bhi yunhi be-bahaar guzri hai

abhi abhi to na aa ai KHayal-e-amad-e-yar

abhi abhi to shab-e-intizar guzri hai

hamein to un ki nigahon ka eatibar nahin

jo kah rahe hain idhar se bahaar guzri hai

tamam umr kiya un ka intizar 'aKHtar'

tamam umr baDi be-qarar guzri hai