misl-e-bahisht-e-KHush-numa kaun-o-makan mein

misl-e-bahisht-e-ḳhush-numā kaun-o-makān meñ

insān mubtalā hai ajiib imtihān meñ

bujhtī nahīñ hai koshish-e-dariyā ke bāvajūd

ye kaisī tishnagī hai mire jism o jaan meñ

vo dhuup meñ khaḌā hai baḌe itminān se

lau de rahā hai merā badan sā.ebān meñ

kyuuñ naam intisāb meñ likhkhā gayā mirā

kirdār jab nahīñ thā mirā dāstān meñ

is baar pastiyāñ bhī mayassar na ā.eñgī

shal ho ga.e jo bāl-o-par ūñchī uḌaan meñ

vābasta tujh se azmat-e-sher-o-suḳhan huī

is baat ko bhī rakhnā 'ḳhayāl' apne dhyān meñ

misl-e-bahisht-e-KHush-numa kaun-o-makan mein

insan mubtala hai ajib imtihan mein

bujhti nahin hai koshish-e-dariya ke bawajud

ye kaisi tishnagi hai mere jism o jaan mein

wo dhup mein khaDa hai baDe itminan se

lau de raha hai mera badan saeban mein

kyun nam intisab mein likhkha gaya mera

kirdar jab nahin tha mera dastan mein

is bar pastiyan bhi mayassar na aaengi

shal ho gae jo baal-o-par unchi uDan mein

wabasta tujh se azmat-e-sher-o-suKHan hui

is baat ko bhi rakhna 'KHayal' apne dhyan mein