misl-e-hubab-e-bahr na itna uchhal ke chal

misl-e-hubāb-e-bahr na itnā uchhal ke chal

haiñ saath saath mauj-e-havādis sambhal ke chal

barg-e-ḳhizāñ-rasīda se aatī thī ye sadā

is bāġh-e-sabz par kaf-e-afsos mal ke chal

darpai nahañg-e-marg hai darpesh chāh-e-gor

mastī na kar havās meñ aa mat machal ke chal

sote haiñ log taar haiñ kūche guzar hai tañg

tārīk shab hai saath charāġh-e-amal ke chal

ai tan-parast jāma-e-sūrat kasīf hai

bazm-e-huzūr-e-dost meñ kapḌe badal ke chal

aatī hai zer-e-ḳhāk se āvāz har qadam

uftādgān-e-rāh ke sar mat kuchal ke chal

kab tak kasāfatoñ meñ rahegā ba-rañg-e-sard

āb-e-ravāñ kī tarah nikal aur nikal ke chal

juuñ sham.a tujh ko ātish-e-ġham se gurez kyuuñ

sar par dharī hai aag qadam tak pighal ke chal

juuñ naḳhl-e-sham.a barq-e-tajallī gire kahīñ

dāġhoñ se ābloñ se 'bayāñ' phuul phal ke chal

misl-e-hubab-e-bahr na itna uchhal ke chal

hain sath sath mauj-e-hawadis sambhal ke chal

barg-e-KHizan-rasida se aati thi ye sada

is bagh-e-sabz par kaf-e-afsos mal ke chal

darpai nahang-e-marg hai darpesh chah-e-gor

masti na kar hawas mein aa mat machal ke chal

sote hain log tar hain kuche guzar hai tang

tarik shab hai sath charagh-e-amal ke chal

ai tan-parast jama-e-surat kasif hai

bazm-e-huzur-e-dost mein kapDe badal ke chal

aati hai zer-e-KHak se aawaz har qadam

uftadgan-e-rah ke sar mat kuchal ke chal

kab tak kasafaton mein rahega ba-rang-e-sard

aab-e-rawan ki tarah nikal aur nikal ke chal

jun shama tujh ko aatish-e-gham se gurez kyun

sar par dhari hai aag qadam tak pighal ke chal

jun naKHl-e-shama barq-e-tajalli gire kahin

daghon se aablon se 'bayan' phul phal ke chal