misl-e-raqs-e-sharar nahin aati

misl-e-raqs-e-sharar nahīñ aatī

zindagī lauT kar nahīñ aatī

dil-dahī kā to koī sāmāñ kar

dilrubā.ī agar nahīñ aatī

hijr meñ maut DhūñDhne vaale

aisī shab kī sahar nahīñ aatī

dil ko de kar fareb-e-shauq-o-talab

ab tamannā nazar nahīñ aatī

ye tabī.at hai hazrat-e-nāseh

ye samajh soch kar nahīñ aatī

ālam-e-be-dilī se bhī yārab

dil kī koī ḳhabar nahīñ aatī

dard dil meñ agar na ho ham-dam

shā.irī umr-bhar nahīñ aatī

aadmī Thokareñ na khaa.e agar

zindagī raah par nahīñ aatī

raas aatī nahīñ agar tadbīr

maut kyuuñ chāragar nahīñ aatī

apnī hālat agar maiñ ḳhud na kahūñ

kyā unheñ bhī nazar nahīñ aatī

tum ko aate haiñ sab jafā-o-jaur

ik vafā hī magar nahīñ aatī

jis nazar se vo dekhte the kabhī

vo nazar ab nazar nahīñ aatī

vaa.e us zindagī kī mahrūmī

maut bhī umr-bhar nahīñ aatī

aah vo ārzū-e-dil 'sāhir'

tā-qayāmat jo bar nahīñ aatī

misl-e-raqs-e-sharar nahin aati

zindagi lauT kar nahin aati

dil-dahi ka to koi saman kar

dilrubai agar nahin aati

hijr mein maut DhunDhne wale

aisi shab ki sahar nahin aati

dil ko de kar fareb-e-shauq-o-talab

ab tamanna nazar nahin aati

ye tabiat hai hazrat-e-naseh

ye samajh soch kar nahin aati

aalam-e-be-dili se bhi yarab

dil ki koi KHabar nahin aati

dard dil mein agar na ho ham-dam

shairi umr-bhar nahin aati

aadmi Thokaren na khae agar

zindagi rah par nahin aati

ras aati nahin agar tadbir

maut kyun chaaragar nahin aati

apni haalat agar main KHud na kahun

kya unhen bhi nazar nahin aati

tum ko aate hain sab jafa-o-jaur

ek wafa hi magar nahin aati

jis nazar se wo dekhte the kabhi

wo nazar ab nazar nahin aati

wae us zindagi ki mahrumi

maut bhi umr-bhar nahin aati

aah wo aarzu-e-dil 'sahir'

ta-qayamat jo bar nahin aati