mison ke samne kya mazhabi bahana chale

misoñ ke sāmne kyā maz.habī bahāna chale

chaleñge ham bhī usī ruḳh jidhar zamāna chale

ḳhudā ke vāste saaqī yahī nigāh-e-karam

chalā hai daur to phir kyoñ ruke chalā na chale

khilā hai bāġh-e-qanā’at meñ ġhuncha-e-ḳhātir

ḳhudā bachā.e kahīñ hirs kī havā na chale

faroġh 'ishq kā be-āh ke nahīñ mumkin

na phaile bū-e-gulistāñ agar havā na chale

khule kivāḌ jo kamre ke phir kisī ko kyā

ye hukm bhī to huā hai ki rāsta na chale

umīd-e-hūr meñ muslim to ho gayā huuñ magar

ḳhudā hī hai ki jo mujh se ye panjgāna chale

ḳhudī kī his se bhī hotā hai intishār 'akbar'

kahāñ rahūñ ki mujhe bhī mirā pata na chale

mison ke samne kya mazhabi bahana chale

chalenge hum bhi usi ruKH jidhar zamana chale

KHuda ke waste saqi yahi nigah-e-karam

chala hai daur to phir kyon ruke chala na chale

khila hai bagh-e-qana’at mein ghuncha-e-KHatir

KHuda bachae kahin hirs ki hawa na chale

farogh 'ishq ka be-ah ke nahin mumkin

na phaile bu-e-gulistan agar hawa na chale

khule kiwaD jo kamre ke phir kisi ko kya

ye hukm bhi to hua hai ki rasta na chale

umid-e-hur mein muslim to ho gaya hun magar

KHuda hi hai ki jo mujh se ye panjgana chale

KHudi ki his se bhi hota hai intishaar 'akbar'

kahan rahun ki mujhe bhi mera pata na chale