miTa chuka rah-e-ulfat mein zindagani ko

miTā chukā rah-e-ulfat meñ zindagānī ko

zamāna ab to sunegā mirī kahānī ko

nazar na aayā sukūñ kā kahīñ koī lamha

bahut qarīb se dekhā hai zindagānī ko

sunegā kaun kise hogī is qadar fursat

tavīl kar to rahe ho mirī kahānī ko

vo mast mast nigāheñ asar jamā hī ga.iiñ

alag sharāb se kartā rahā maiñ paanī ko

kabhī to un kī tavajjoh mirī taraf hogī

hazār baar maiñ dohrā.ūñgā kahānī ko

tire ḳhayāl se ġhāfil kahīñ na ho jā.ūñ

maiñ chhūte Dartā huuñ ab jām-e-arġhavānī ko

hayāt-e-nau jise baḳhshī thī 'nūr' maiñ ne kabhī

miTā rahā hai vahī merī zindagānī ko

miTa chuka rah-e-ulfat mein zindagani ko

zamana ab to sunega meri kahani ko

nazar na aaya sukun ka kahin koi lamha

bahut qarib se dekha hai zindagani ko

sunega kaun kise hogi is qadar fursat

tawil kar to rahe ho meri kahani ko

wo mast mast nigahen asar jama hi gain

alag sharab se karta raha main pani ko

kabhi to un ki tawajjoh meri taraf hogi

hazar bar main dohraunga kahani ko

tere KHayal se ghafil kahin na ho jaun

main chhute Darta hun ab jam-e-arghawani ko

hayat-e-nau jise baKHshi thi 'nur' main ne kabhi

miTa raha hai wahi meri zindagani ko