miyan-e-rahzan-o-rahbar mujhe nahin malum

miyān-e-rahzan-o-rahbar mujhe nahīñ mā'lūm

ye kaun hai mire andar mujhe nahīñ mā'lūm

liye to phirtā huuñ ik vus’at-e-nazar ko maiñ

ye 'ishq hai ki samundar mujhe nahīñ mā'lūm

zarā sī der ko maddham huī charāġh kī lau

phir us ke baa'd kā manzar mujhe nahīñ mā'lūm

sitāra-vār chalā thā dayār-e-ḳhvāb kī samt

ye aa gayā huuñ kahāñ par mujhe nahīñ mā'lūm

bas ik uḌaan kī ḳhvāhish ne aa liyā thā mujhe

kahāñ ga.e mire shahpar mujhe nahīñ mā'lūm

maiñ tujh se duur kisī shahr-e-nā-rasā meñ huuñ

maiñ kis liye huuñ yahāñ par mujhe nahīñ mā'lūm

guzar rahā huuñ kisī qarya-e-jamīl se ab

bahisht hai ki tirā ghar mujhe nahīñ mā'lūm

miyan-e-rahzan-o-rahbar mujhe nahin ma'lum

ye kaun hai mere andar mujhe nahin ma'lum

liye to phirta hun ek wus’at-e-nazar ko main

ye 'ishq hai ki samundar mujhe nahin ma'lum

zara si der ko maddham hui charagh ki lau

phir us ke ba'd ka manzar mujhe nahin ma'lum

sitara-war chala tha dayar-e-KHwab ki samt

ye aa gaya hun kahan par mujhe nahin ma'lum

bas ek uDan ki KHwahish ne aa liya tha mujhe

kahan gae mere shahpar mujhe nahin ma'lum

main tujh se dur kisi shahr-e-na-rasa mein hun

main kis liye hun yahan par mujhe nahin ma'lum

guzar raha hun kisi qarya-e-jamil se ab

bahisht hai ki tera ghar mujhe nahin ma'lum