mizaj-e-dahr mein un ka ishaara pae ja

mizāj-e-dahr meñ un kā ishāra paa.e jā

jo ho sake to bahar-hāl muskurā.e jā

bahār-e-sad-chamanistān-e-ārzū ban kar

mire ḳhayāl kī rañgīniyoñ meñ aa.e jā

ḳhirad-navāz nigāhoñ kī aaḌ meñ rah kar

fazā-e-ālam-e-dīvāngī pe chhā.e jā

pilā.e jā ki abhī hosh-e-be-ḳhudī hai mujhe

pilā.e jā mujhe saaqī abhī pilā.e jā

dil o jigar pe guzar jā.egī jo guzregī

tirī nazar se jo fitne uTheñ uThā.e jā

zarā Thahr ki ab anjām-e-soz-e-ġham hai qarīb

charāġh-e-zīst bhaḌakne ko hai bujhā.e jā

sukūt-e-mayyat-e-'fānī' hai ik fasāna-e-shauq

lab-e-ḳhamosh se har mudda.ā ko paa.e jā

mizaj-e-dahr mein un ka ishaara pae ja

jo ho sake to bahar-haal muskurae ja

bahaar-e-sad-chamanistan-e-arzu ban kar

mere KHayal ki ranginiyon mein aae ja

KHirad-nawaz nigahon ki aaD mein rah kar

faza-e-alam-e-diwangi pe chhae ja

pilae ja ki abhi hosh-e-be-KHudi hai mujhe

pilae ja mujhe saqi abhi pilae ja

dil o jigar pe guzar jaegi jo guzregi

teri nazar se jo fitne uThen uThae ja

zara Thahr ki ab anjam-e-soz-e-gham hai qarib

charagh-e-zist bhaDakne ko hai bujhae ja

sukut-e-mayyat-e-'fani' hai ek fasana-e-shauq

lab-e-KHamosh se har muddaa ko pae ja