mizaj-e-gham samajhta kyun nahin hai

mizāj-e-ġham samajhtā kyuuñ nahīñ hai

mirā idrāk mujh sā kyuuñ nahīñ hai

garajtā hai barastā kyuuñ nahīñ hai

yahāñ bādal bhī sachchā kyuuñ nahīñ hai

kahāñ tak ā.inoñ ko ham badalte

hamārā kuchh bhī achchhā kyuuñ nahīñ hai

nahīñ suntā kharī ik baat koī

kharā sikka bhī chaltā kyuuñ nahīñ hai

safar jaarī hai aur maiñ kis se pūchhūñ

koī rasta bhī sīdhā kyuuñ nahīñ hai

ta.ajjub hai yahāñ us shahr meñ ab

kisī kāñdhe pe chehrā kyuuñ nahīñ hai

vo sāgar hai agar tū kyuuñ hai pyāsā

vo gāgar hai to bhartā kyuuñ nahīñ hai

bahut ashjār haiñ in rāstoñ meñ

mire sar phir bhī saayā kyuuñ nahīñ hai

burīda-par nahīñ koī qafas meñ

parinda phir bhī uḌtā kyuuñ nahīñ hai

agarche dāstāñ merī hai phir bhī

koī kirdār mujh sā kyuuñ nahīñ hai

bahā detā hai kyuuñ aañsū meñ 'tālib'

ġhazal ke sher kahtā kyuuñ nahīñ hai

mizaj-e-gham samajhta kyun nahin hai

mera idrak mujh sa kyun nahin hai

garajta hai barasta kyun nahin hai

yahan baadal bhi sachcha kyun nahin hai

kahan tak aainon ko hum badalte

hamara kuchh bhi achchha kyun nahin hai

nahin sunta khari ek baat koi

khara sikka bhi chalta kyun nahin hai

safar jari hai aur main kis se puchhun

koi rasta bhi sidha kyun nahin hai

tajjub hai yahan us shahr mein ab

kisi kandhe pe chehra kyun nahin hai

wo sagar hai agar tu kyun hai pyasa

wo gagar hai to bharta kyun nahin hai

bahut ashjar hain in raston mein

mere sar phir bhi saya kyun nahin hai

burida-par nahin koi qafas mein

parinda phir bhi uDta kyun nahin hai

agarche dastan meri hai phir bhi

koi kirdar mujh sa kyun nahin hai

baha deta hai kyun aansu mein 'talib'

ghazal ke sher kahta kyun nahin hai