mizha pe KHwab nahin intizar sa kuchh hai

mizha pe ḳhvāb nahīñ intizār sā kuchh hai

bahār to nahīñ aks-e-bahār sā kuchh hai

mujhe milā na kabhī farsh-e-gul pe bhī ārām

yahī lagā ki kahīñ nok-e-ḳhār sā kuchh hai

jo paas thā isī saudā-e-sar kī nazr huā

na dhajjiyāñ hī bachī haiñ na taar sā kuchh hai

tamām umr jise maiñ ubuur kar na sakā

darūn-e-zāt mire be-kanār sā kuchh hai

guzar ga.ī mujhe chhū kar kisī ḳhayāl kī rau

ufuq se tā-ba-ufuq rañg-zār sā kuchh hai

ḳhayāl-o-ḳhvāb hue sab visāl ke lamhe

nazar meñ sirf chamaktā ġhubār sā kuchh hai

ye haal hai ki havāoñ se uljhā jaatā huuñ

lahū meñ ab ke ajab intishār sā kuchh hai

mizha pe KHwab nahin intizar sa kuchh hai

bahaar to nahin aks-e-bahaar sa kuchh hai

mujhe mila na kabhi farsh-e-gul pe bhi aaram

yahi laga ki kahin nok-e-KHar sa kuchh hai

jo pas tha isi sauda-e-sar ki nazr hua

na dhajjiyan hi bachi hain na tar sa kuchh hai

tamam umr jise main ubur kar na saka

darun-e-zat mere be-kanar sa kuchh hai

guzar gai mujhe chhu kar kisi KHayal ki rau

ufuq se ta-ba-ufuq rang-zar sa kuchh hai

KHayal-o-KHwab hue sab visal ke lamhe

nazar mein sirf chamakta ghubar sa kuchh hai

ye haal hai ki hawaon se uljha jata hun

lahu mein ab ke ajab intishaar sa kuchh hai