moD tha kaisa tujhe tha khone wala main

moḌ thā kaisā tujhe thā khone vaalā maiñ

ro hī paḌā huuñ kabhī na rone vaalā maiñ

kyā jhoñkā thā chamak gayā tan man saarā

pata na thā phir raakh thā hone vaalā maiñ

lahr thī kaisī mujhe bhañvar meñ le aa.ī

nadī kināre haath bhigone vaalā maiñ

rañg kahāñ thā phuul kī pattī pattī meñ

kiran kiran sī dhuup pirone vaalā maiñ

kyā din biitā sab kuchh aañkh meñ phirtā hai

jaag rahā huuñ maze meñ sone vaalā maiñ

shahr-e-ḳhizāñ hai zardī oḌhe khaḌe haiñ peḌ

manzar manzar nazar chubhone vaalā maiñ

jo kuchh hai is paar vahī us paar bhī hai

naav ab apnī aap Dubone vaalā maiñ

moD tha kaisa tujhe tha khone wala main

ro hi paDa hun kabhi na rone wala main

kya jhonka tha chamak gaya tan man sara

pata na tha phir rakh tha hone wala main

lahr thi kaisi mujhe bhanwar mein le aai

nadi kinare hath bhigone wala main

rang kahan tha phul ki patti patti mein

kiran kiran si dhup pirone wala main

kya din bita sab kuchh aankh mein phirta hai

jag raha hun maze mein sone wala main

shahr-e-KHizan hai zardi oDhe khaDe hain peD

manzar manzar nazar chubhone wala main

jo kuchh hai is par wahi us par bhi hai

naw ab apni aap Dubone wala main