mohabbat bais-e-na-mehrbani hoti jati hai

mohabbat bā.is-e-nā-mehrbānī hotī jaatī hai

hamārī saarī mehnat dhūl-dhānī hotī jaatī hai

hikāyat huuñ jo rātoñ ko hamesha hotī rahtī hai

shikāyat huuñ jo aapas meñ zabānī hotī jaatī hai

tirā ġham aaj tak taaza hai zālim varna duniyā meñ

na.ī shai din guzarne se purānī hotī jaatī hai

tumhārī yaad meñ ahl-e-jahāñ mar mar ke jiite haiñ

qazā logoñ ke haq meñ zindagānī hotī jaatī hai

baḌā ilzām Thahrā hai ta.alluq rishta-dārī kā

qarābat kī mohabbat bad-gumānī hotī jaatī hai

yahī tambīh milne par unheñ majbūr kartī hai

yahī tākīd goyā zid kī baanī hotī jaatī hai

mire ġham meñ vo majbūrī se un hāloñ ko pahuñche haiñ

ki ab un kī nazākat nā-tavānī hotī jaatī hai

tire kūche meñ ab gardish kī sūrat paḌtī jaatī hai

zamīñ kī chaal daur-e-āsmānī hotī jaatī hai

mire pahlū meñ dil kab thā lahū kī buuñd thī 'muztar'

so ab vo buuñd bhī qismat se paanī hotī jaatī hai

mohabbat bais-e-na-mehrbani hoti jati hai

hamari sari mehnat dhul-dhani hoti jati hai

hikayat hun jo raaton ko hamesha hoti rahti hai

shikayat hun jo aapas mein zabani hoti jati hai

tera gham aaj tak taza hai zalim warna duniya mein

nai shai din guzarne se purani hoti jati hai

tumhaari yaad mein ahl-e-jahan mar mar ke jite hain

qaza logon ke haq mein zindagani hoti jati hai

baDa ilzam Thahra hai talluq rishta-dari ka

qarabat ki mohabbat bad-gumani hoti jati hai

yahi tambih milne par unhen majbur karti hai

yahi takid goya zid ki bani hoti jati hai

mere gham mein wo majburi se un haalon ko pahunche hain

ki ab un ki nazakat na-tawani hoti jati hai

tere kuche mein ab gardish ki surat paDti jati hai

zamin ki chaal daur-e-asmani hoti jati hai

mere pahlu mein dil kab tha lahu ki bund thi 'muztar'

so ab wo bund bhi qismat se pani hoti jati hai