mohabbat ho to sham-e-gham bhi pur-tanwir hoti hai

mohabbat ho to shām-e-ġham bhī pur-tanvīr hotī hai

chamak sī dil meñ āñkhoñ meñ koī tasvīr hotī hai

nazar aa.e bahut masrūr arbāb-e-chaman mujh ko

nahīñ ma.alūm kyā is ḳhvāb kī ta.abīr hotī hai

yahī tārīkiyāñ ġham kī payām-e-amn lā.eñgī

añdheroñ ke pas-e-parda sahar ta.amīr hotī hai

javānī kī ḳhatāoñ par sazā.eñ dāvar-e-mahshar

kahīñ dīvāngī bhī qābil-e-tāzīr hotī hai

nikal jaate kabhī ke nik.hat-e-gul kī tarah 'qaisar'

magar ḳhāk-e-vatan uTh uTh ke dāman-gīr hotī hai

mohabbat ho to sham-e-gham bhi pur-tanwir hoti hai

chamak si dil mein aankhon mein koi taswir hoti hai

nazar aae bahut masrur arbab-e-chaman mujh ko

nahin malum kya is KHwab ki tabir hoti hai

yahi tarikiyan gham ki payam-e-amn laengi

andheron ke pas-e-parda sahar tamir hoti hai

jawani ki KHataon par sazaen dawar-e-mahshar

kahin diwangi bhi qabil-e-tazir hoti hai

nikal jate kabhi ke nikhat-e-gul ki tarah 'qaisar'

magar KHak-e-watan uTh uTh ke daman-gir hoti hai