mohabbat ka ajab zawiya hai

mohabbat kā ajab zāviya hai

havā.eñ chār-sū aur ik diyā hai

ham ahl-e-dard ḳhud se pūchhte haiñ

vatan ko ham ne ab tak kyā diyā hai

sitamgar ke sitam itne baḌhe haiñ

laboñ ko aaj ham ne sī liyā hai

achānak bol uThe dīvār-o-dar bhī

ye kis kā naam maiñ ne le liyā hai

tumhāre ḳhvāb āḳhir kyā hue haiñ

haqīqat-āshnā kis ne kiyā hai

tumhārī pyaas kyuuñ bujhtī nahīñ hai

ye kis kī ok se paanī piyā hai

mirī āñkhoñ se aañsū kis ne poñchhe

garebāñ chaak ye kis ne siyā hai

sabhī ko lauTnā hai ik na ik din

'hasan' duniyā meñ kaun itnā jiyā hai

mohabbat ka ajab zawiya hai

hawaen chaar-su aur ek diya hai

hum ahl-e-dard KHud se puchhte hain

watan ko hum ne ab tak kya diya hai

sitamgar ke sitam itne baDhe hain

labon ko aaj hum ne si liya hai

achanak bol uThe diwar-o-dar bhi

ye kis ka nam main ne le liya hai

tumhaare KHwab aaKHir kya hue hain

haqiqat-ashna kis ne kiya hai

tumhaari pyas kyun bujhti nahin hai

ye kis ki ok se pani piya hai

meri aankhon se aansu kis ne ponchhe

gareban chaak ye kis ne siya hai

sabhi ko lauTna hai ek na ek din

'hasan' duniya mein kaun itna jiya hai