mohabbat kam-nigahon ko nazar mein la nahin sakti

mohabbat kam-nigāhoñ ko nazar meñ lā nahīñ saktī

ye bijlī har ḳhas-o-ḳhāshāk se Takrā nahīñ saktī

jo kahnā hai kaho haq par kabhī aañch aa nahīñ saktī

koī tāqat ḳhulūs-e-fikr ko jhuTlā nahīñ saktī

girā kar arsh se bhī husn-e-be-parvā ne dekhā hai

koī aalam ho merī ādamiyyat jā nahīñ saktī

matānat aa chukī hai un ke lahje un kī bātoñ meñ

vo chāheñ laakh chehre par matānat aa nahīñ saktī

na samjho dost kī had tak kamāl apnī mohabbat kā

abhī nāqis hai dushman ko agar taḌpā nahīñ saktī

girā huuñ rabb-e-qibla jab bhī Thokar maiñ ne khaa.ī hai

mirī ḳhuddārī aisī vaisī Thokar khā nahīñ saktī

kabhī tīr-e-nigāh-e-nāz ḳhālī jā nahīñ saktā

koī nekī bhī aise vaqt aaḌe aa nahīñ saktī

nasheman merā rahne do chaman par aañch gar aa.ī

nasheman hī pe aa.egī chaman par aa nahīñ saktī

haqā.eq hī raheñge 'najm' merī fikr kā hāsil

ḳhayāl-o-ḳhvāb meñ fikr-e-suḳhan uljhā nahīñ saktī

mohabbat kam-nigahon ko nazar mein la nahin sakti

ye bijli har KHas-o-KHashak se Takra nahin sakti

jo kahna hai kaho haq par kabhi aanch aa nahin sakti

koi taqat KHulus-e-fikr ko jhuTla nahin sakti

gira kar arsh se bhi husn-e-be-parwa ne dekha hai

koi aalam ho meri aadamiyyat ja nahin sakti

matanat aa chuki hai un ke lahje un ki baaton mein

wo chahen lakh chehre par matanat aa nahin sakti

na samjho dost ki had tak kamal apni mohabbat ka

abhi naqis hai dushman ko agar taDpa nahin sakti

gira hun rabb-e-qibla jab bhi Thokar main ne khai hai

meri KHuddari aisi waisi Thokar kha nahin sakti

kabhi tir-e-nigah-e-naz KHali ja nahin sakta

koi neki bhi aise waqt aaDe aa nahin sakti

nasheman mera rahne do chaman par aanch gar aai

nasheman hi pe aaegi chaman par aa nahin sakti

haqaeq hi rahenge 'najm' meri fikr ka hasil

KHayal-o-KHwab mein fikr-e-suKHan uljha nahin sakti