mohabbat karne walon ki dil-azari nahin karte

mohabbat karne vāloñ kī dil-āzārī nahīñ karte

ḳhatā par sar jhukāne vaale makkārī nahīñ karte

ham apnā āsmān-e-fan ḳhud apne saath rakhte haiñ

kisī kī sham.a se ghar meñ ziyā-bārī nahīñ karte

hameñ paanī pe chalne kā hunar ma.alūm hai lekin

kisī hālat meñ ham koī adākārī nahīñ karte

rivāyat tāzgī-e-fikr se mahrūm rah jaatī

agar ham 'mīr'-o-'ġhālib' kī taraf-dārī nahīñ karte

hamāre aslaha-ḳhānoñ meñ aksar aag lagtī hai

magar ham kaam koī ġhair-sarkārī nahīñ karte

janāza uTh gayā jab se yahāñ īmān-dārī kā

ham apne rahbaroñ kī nāz-bardārī nahīñ karte

vo registāñ ko dāvat de ke apne ghar bulāte haiñ

kabhī jo apnī bastī meñ shajar-kārī nahīñ karte

mohabbat karne walon ki dil-azari nahin karte

KHata par sar jhukane wale makkari nahin karte

hum apna aasman-e-fan KHud apne sath rakhte hain

kisi ki shama se ghar mein ziya-bari nahin karte

hamein pani pe chalne ka hunar malum hai lekin

kisi haalat mein hum koi adakari nahin karte

riwayat tazgi-e-fikr se mahrum rah jati

agar hum 'mir'-o-'ghaalib' ki taraf-dari nahin karte

hamare aslaha-KHanon mein aksar aag lagti hai

magar hum kaam koi ghair-sarkari nahin karte

janaza uTh gaya jab se yahan iman-dari ka

hum apne rahbaron ki naz-bardari nahin karte

wo registan ko dawat de ke apne ghar bulate hain

kabhi jo apni basti mein shajar-kari nahin karte