mohabbat ki jahanbani ke din hain

mohabbat kī jahāñbānī ke din haiñ

zamīñ par ḳhuld-sāmānī ke din haiñ

ye hai daur-e-jalāl-e-ibn-e-ādam

na sultānī na ḳhāqānī ke din haiñ

jo haiñ apnī jagah ḳhurshīd-buniyād

ab un zarroñ kī tābānī ke din haiñ

irādoñ kī bulandī auj par hai

havādis kī pashemānī ke din haiñ

har ik zanjīr hai ab pā-shikasta

har ik zindāñ kī vīrānī ke din haiñ

qasīde bādshāhoñ ke hue ḳhatm

mohabbat kī ġhazal-ḳhvānī ke din haiñ

taqaddus ho farishtoñ ko mubārak

'ravish' ab ḳhalq-e-insānī ke din haiñ

mohabbat ki jahanbani ke din hain

zamin par KHuld-samani ke din hain

ye hai daur-e-jalal-e-ibn-e-adam

na sultani na KHaqani ke din hain

jo hain apni jagah KHurshid-buniyaad

ab un zarron ki tabani ke din hain

iradon ki bulandi auj par hai

hawadis ki pashemani ke din hain

har ek zanjir hai ab pa-shikasta

har ek zindan ki virani ke din hain

qaside baadshahon ke hue KHatm

mohabbat ki ghazal-KHwani ke din hain

taqaddus ho farishton ko mubarak

'rawish' ab KHalq-e-insani ke din hain