mohabbat ki jo miTTi se bane insan hote hain

mohabbat kī jo miTTī se bane insān hote haiñ

vafā ke jurm meñ aksar pas-e-zindān hote haiñ

bahut ḳhāmosh rahte haiñ jafā ke ġham ko sahte haiñ

kisī vīrān raste kī tarah sunsān hote haiñ

binā soche binā samjhe jahāñ dil de diyā jaa.e

vahāñ jaur-o-jafā ke bhī bahut imkān hote haiñ

samajhte haiñ hasīnoñ ko vafā-sūrat vafā-sīrat

ye 'āshiq log bhī kaise 'ajab nādān hote haiñ

agar dil ke samundar meñ ho madd-o-jazr kī shorish

to āñkhoñ ke nagar meñ bhī bahut tūfān hote haiñ

girā detī haiñ un ko āñdhiyāñ yak-laḳht dhartī par

jaḌoñ se jo shajar bhī khokhle be-jān hote haiñ

hazāroñ ḳhvāhishoñ ke ham mahal tā'mīr karte haiñ

kahāñ puure bhalā dil ke sabhī armān hote haiñ

'sahāb' apnā ta'alluq soch kar tum toḌnā un se

ye bandhan toḌne itne kahāñ āsān hote haiñ

mohabbat ki jo miTTi se bane insan hote hain

wafa ke jurm mein aksar pas-e-zindan hote hain

bahut KHamosh rahte hain jafa ke gham ko sahte hain

kisi viran raste ki tarah sunsan hote hain

bina soche bina samjhe jahan dil de diya jae

wahan jaur-o-jafa ke bhi bahut imkan hote hain

samajhte hain hasinon ko wafa-surat wafa-sirat

ye 'ashiq log bhi kaise 'ajab nadan hote hain

agar dil ke samundar mein ho madd-o-jazr ki shorish

to aankhon ke nagar mein bhi bahut tufan hote hain

gira deti hain un ko aandhiyan yak-laKHt dharti par

jaDon se jo shajar bhi khokhle be-jaan hote hain

hazaron KHwahishon ke hum mahal ta'mir karte hain

kahan pure bhala dil ke sabhi arman hote hain

'sahab' apna ta'alluq soch kar tum toDna un se

ye bandhan toDne itne kahan aasan hote hain