mohabbat ki mata-e-jawedani le ke aaya hun

mohabbat kī matā-e-jāvedānī le ke aayā huuñ

tire qadmoñ meñ apnī zindagānī le ke aayā huuñ

kahāñ sīm-o-guhar jin ko luTā.ūñ tere qadmoñ par

barā-e-nazr ashkoñ kī ravānī le ke aayā huuñ

tujhe jo pūchhnā ho pūchh le ai dāvar-e-mahshar

maiñ apne saath apnī be-zabānī le ke aayā huuñ

zamīn-o-mulk ke badle diloñ par hai nazar merī

achhūtā ik tarīq-e-hukmarānī le ke aayā huuñ

mire zaḳhm-e-tamannā dekh kar pahchān lo mujh ko

tumhārī hī atā-karda nishānī le ke aayā huuñ

mire ash.ār meñ muzmar haiñ lākhoñ dhaḌkaneñ dil kī

maiñ ik duniyā kā ġham dil kī zabānī le ke aayā huuñ

mohabbat naam hai betābī-e-dil ke tasalsul kā

mohabbat kī maiñ 'darshan' ye nishānī le ke aayā huuñ

mohabbat ki mata-e-jawedani le ke aaya hun

tere qadmon mein apni zindagani le ke aaya hun

kahan sim-o-guhar jin ko luTaun tere qadmon par

bara-e-nazr ashkon ki rawani le ke aaya hun

tujhe jo puchhna ho puchh le ai dawar-e-mahshar

main apne sath apni be-zabani le ke aaya hun

zamin-o-mulk ke badle dilon par hai nazar meri

achhuta ek tariq-e-hukmarani le ke aaya hun

mere zaKHm-e-tamanna dekh kar pahchan lo mujh ko

tumhaari hi ata-karda nishani le ke aaya hun

mere ashaar mein muzmar hain lakhon dhaDkanen dil ki

main ek duniya ka gham dil ki zabani le ke aaya hun

mohabbat nam hai betabi-e-dil ke tasalsul ka

mohabbat ki main 'darshan' ye nishani le ke aaya hun